Шүүхийн шийдвэрийн огноо, дугаар:   2023.11.20-ны өдрийн 128/ШШ2023/0861

Шийдвэрийн төлөв: Хүчин төгөлдөр болсон

   Х болон Н компаниудад ашиглах эрх олгосон газрын давхцлын маргааныг шийдвэрлэсэн захиргааны хэргийн шүүхийн шийдвэр, магадлалаар Х компанид газар ашиглах эрх олгосон шийдвэрийг хариуцагчаас дахин шинэ акт гартал 6 сарын хугацаатай түдгэлзүүлж шийдвэрлэсэн байна.

   Хариуцагч захиргааны байгууллага Х компанид газар ашиглах эрх олгосон тушаалаа “шүүхийн шийдвэр биелүүлж” гэх үндэслэлээр Захиргааны хэрэг шүүхэд хянан шийдвэрлэх тухай хуулийн 107.6 дахь хэсгийг баримтлан хүчингүй болсонд тооцсон бөгөөд Х компани “захиргааны байгууллага дахин шинэ акт гаргах ажиллагааг огт хийгээгүй, шүүхээс тогтоосон хугацаа дуусаагүй байхад маргаан бүхий актыг хүчингүй болсонд тооцсон нь хууль бус” гэж маргасан.

   Газрын давхцлын маргааныг шийдвэрлэхдээ шүүх “шүүх хэргийн нөхцөл байдлыг цаашид тодруулах шаардлагатай гэж үзсэн бөгөөд нэмж тодруулах цар хүрээ шүүхийн шинжлэн судлах боломжид хамааралгүй буюу Н компанийн ашиглах эрхтэй газрын талбайн цэгүүд хаана болох, анх олгосон газрын талбайн хил заагийн цэгүүдээс өөрчлөгдсөн эсэх, түүнчлэн Х компанид олгосон гэх газар нь бодит байдалд хаана байрлалтай зэргийг судлан тодруулж, дахин тогтоох нь хариуцагч байгууллагын үүрэгт хамааралтай байх тул энэ нөхцөл байдлыг шинжлэн судалж тогтоосны эцэст 2 хуулийн этгээдийн хэн алиных нь газар ашиглах эрх, хууль ёсны ашиг сонирхлыг хөндөхгүйгээр хуульд нийцүүлэн дахин шинэ акт гаргах замаар тэдгээрийн хоорондох газрын маргааныг нэг мөр шийдвэрлэх шаардлагатай” гэж дүгнэжээ.

   Ийнхүү хуулийн хүчин төгөлдөр шүүхийн шийдвэрээр хариуцагч захиргааны байгууллагын шинжлэн судалж тогтоох нөхцөл байдлыг тодорхой зааж, эдгээр ажиллагааг хийж, нөхцөл байдлыг бүрэн дүүрэн тогтоосны эцэст хуулийн этгээдүүдийн хэн алиных нь газар ашиглах эрх, хууль ёсны ашиг сонирхлыг хөндөхгүйгээр хуульд нийцүүлэн дахин шинэ акт гаргах замаар маргааныг нэг мөр шийдвэрлэх үүргийг хариуцагчид хүлээлгэсэн байхад хариуцагч захиргааны байгууллага “шүүхээс тогтоосон хугацаанд шийдвэрт заасан ажиллагааг огт хийлгүйгээр”,  “түдгэлзсэн захиргааны акт хүчингүй болох үр дагавар үүсэхээс ч өмнө” Х компанид газар ашиглах эрх олгосон тушаалаа “шүүхийн шийдвэр биелүүлж” гэх үндэслэлээр хүчингүй болсонд тооцсон нь Захиргааны хэрэг шүүхэд  хянан шийдвэрлэх тухай хуулийн 106.3.11, 107.6 дахь зохицуулалтыг буруу тайлбарлаж хэрэглэсэн нь хууль бус болсон гэж шийдвэрлэв.

https://shuukh.mn/single_case/14335?daterange=2023-11-20%20-%202026-01-21&id=1&court_cat=3&bb=1

Тойм бичсэн: Нийслэл дэх Захиргааны хэргийн анхан шатны шүүхийн шүүгч Д.Халиуна