/”Онч шийдэл” НҮТББ-ын нэхэмжлэлтэй захиргааны хэрэг/

Шүүхийн шийдвэрийн огноо, дугаар: 2026.01.16-ны өдрийн 128/ШШ2026/0081

Шийдвэрийн төлөв: Хүчин төгөлдөр болоогүй

   “Онч шийдэл” НҮТББ-аас “Эм Энд Жи констракшн” ХХК-д газар олгосон нийслэлийн Засаг даргын шийдвэр болон барилга барих зөвшөөрөл олгосон Барилга хот байгуулалт, орон сууцжуулалтын яам, нийслэлийн Ерөнхий архитектор, Барилгын хөгжлийн төвийн холбогдох шийдвэрүүдийн Дунд голын онцгой хамгаалалтын бүстэй давхацсан хэсгийг хууль бус байсан болохыг тогтоолгож, хүчингүй болгуулахаар нийтийн ашиг сонирхлыг төлөөлөн шүүхэд нэхэмжлэл гаргажээ.

   Нэхэмжлэгч төрийн бус байгууллага нь “Эм Энд Жи констракшн” ХХК-ийн эзэмшиж буй газар нь усны онцгой хамгаалалтын бүстэй давхцалтай, онцгой хамгаалалтын бүсэд барилга байгууламж барихыг хориглосон байхад орон сууцны зориулалтаар газар олгосон, хууль бус захирамжаар олгосон газарт барилгын ажлын холбогдох зөвшөөрлийг олгосон нь бүхэлдээ хууль бус, тус газрыг нийтээр ашиглах эрхийг зөрчсөн гэх агуулгаар маргасан бөгөөд энэхүү маргааны гол зүйл нь “Эм Энд Жи констракшн” ХХК-ийн эзэмшиж буй газар нь дунд голын онцгой хамгаалалтын бүсэд хамаарах эсэх асуудал юм.

   Анх 2008 онд нийслэлийн Засаг даргаас “Эм Энд Жи констракшн” ХХК-ийн одоо эзэмшиж буй газрыг ашиглах эрхийг олгосон бөгөөд 2020 онд нийслэлийн Засаг дарга “Эм Энд Жи констракшн” ХХК-ийн газар эзэмших эрхийг хүчингүй болгож шийдвэрлэсэн байна.

   Улмаар “Эм Энд Жи констракшн” ХХК-аас нийслэлийн Засаг даргын шийдвэрийг эс зөвшөөрч шүүхэд нэхэмжлэл гаргасныг /энэ захиргааны хэрэг үүсэхээс өмнө/ шүүх хянаад, тус шүүхийн 2021 оны 03 дугаар сарын 03-ны өдрийн 147 дугаартай шийдвэрээр “Эм Энд Жи констракшн” ХХК-ийн нэхэмжлэлийн шаардлагыг бүхэлд нь хангаж шийдвэрлэсэн бөгөөд уг шүүхийн шийдвэрт “...Сэлбэ гол, Дунд голын 2.6 км үерийн далангийн засвар шинэчлэлийн ажилд зориулан төсөв баталж, үерийн далан байгуулагдсан ... Усны сан бүхий газар, усны эх үүсвэрийн онцгой болон энгийн хамгаалалтын, эрүүл ахуйн бүсийн дэглэмийг мөрдөх журмын 2.4-т...үерийн хамгаалалт, тохируулгын далан боомт, ... зэрэг дэд бүтцийн байгууламж бүхий газарт онцгой хамгаалалтын бүс тогтоохгүй гэж заасан нь маргаан бүхий газарт үйлчлэхээр байх бөгөөд энэ талаар талууд маргаагүй” гэж дүгнэсэн байна.

   Дээрх 2021 оны 147 дугаартай шүүхийн шийдвэр нь хуулийн хүчин төгөлдөр болсон, одоо энэ захиргааны хэрэгт маргаж буй маргааны гол үндэслэлд хамаарах үйл баримтад холбогдуулан “Эм Энд Жи констракшн” ХХК-ийн эзэмшиж буй газарт онцгой хамгаалалтын бүс тогтоохгүй талаар нэгэнт дүгнэжээ.

Тиймээс Захиргааны хэрэг шүүхэд хянан шийдвэрлэх тухай хуулийн 34 дүгээр зүйлийн 34.4-т “Хуулийн хүчин төгөлдөр шүүхийн шийдвэрээр нэгэнт тогтоогдсон болон нийтэд илэрхий үйл баримт хэрэг хянан шийдвэрлэхэд холбогдолтой байвал түүнийг дахин нотлохгүй” гэж заасан тул тус шүүхийн 2021 оны 147 дугаартай хуулийн хүчин төгөлдөр шүүхийн шийдвэрээр тогтоогдсон үйл баримтыг шүүх дахин нотлохгүй.

   Ийнхүү газар эзэмших эрх олгосон шийдвэр нь хууль бус байсан болох нь тогтоогдохгүй байх тул түүнийг үндэслэж гарсан барилгын ажлын холбогдох зөвшөөрлийг хүчингүй болгох үндэслэлгүй байна гэж шүүх үзлээ.

Тойм бичсэн: Нийслэл дэх Захиргааны хэргийн анхан шатны шүүхийн шүүгч С.Одмаа, шүүгч Н.Дуламсүрэн, шүүгч А.Ганзориг