Шүүгчийн захирамжийн огноо, дугаар: 2025.07.25-ны өдрийн 128/ШЗ2025/4805

Захирамжийн төлөв: Хүчин төгөлдөр болсон

“А” хуулийн этгээдээс шүүхэд хандан “Х Т ХХК-ийг шийтгэлээс чөлөөлсөн буюу Зөрчил шалган шийдвэрлэх тухай хуулийн 7.2 дугаар зүйлийн 1-д зааснаар шийтгэл ногдуулаагүй Улсын бүртгэлийн ерөнхий газрын Хяналт шалгалтын газрын хяналтын улсын ахлах байцаагч М-ийн 2025 оны ХХ дугаар сарын ҮҮ-ны өдрийн Зөрчлийн хэргийг хэрэгсэхгүй болгох тухай шийдвэрийг хүчингүй болгуулах, Х Т ХХК-д Зөрчлийн тухай хуулийн 10.20 дугаар зүйлд зааснаар шийтгэл ногдуулахыг даалгах тухай” гомдол гаргажээ.

Зөрчил шалган шийдвэрлэх тухай хуулийн 6.11 дүгээр зүйлийн 1 дэх хэсэгт “Эрх бүхий албан тушаалтан дараахь үндэслэл тогтоогдвол зөрчлийн хэргийг хэрэгсэхгүй болгох шийдвэр гаргана:”, 3 дахь хэсэгт “Оролцогч энэ зүйлийн 1 дэх хэсэгт заасан шийдвэрийг эс зөвшөөрвөл энэ хуулийн 1.12 дугаар зүйлд заасны дагуу гомдол гаргана.”, мөн хуулийн 1.12 дугаар зүйлийн 1 дэх хэсэгт “Оролцогч зөрчлийн хэрэг бүртгэлтийн шатанд эрх бүхий албан тушаалтны шийдвэр, үйл ажиллагааны талаар прокурорт гомдол гаргах эрхтэй.” гэж тус тус заасан.

Улсын бүртгэлийн ерөнхий газрын Хяналт шалгалтын газрын хяналтын улсын ахлах байцаагч М-ийн гаргасан 2025 оны ХХ дугаар сарын ҮҮ-ны өдрийн “Зөрчлийн хэргийг хэрэгсэхгүй болгох тухай” шийдвэрийг эс зөвшөөрвөл оролцогч нь прокурорт гомдол гаргахаар хуульчилсан байх тул зөрчлийн хэргийг хэрэгсэхгүй болгох тухай шийдвэртэй холбоотой маргааныг Захиргааны хэргийн шүүх шийдвэрлэхгүй, харин гомдол гаргагч нь энэ талаарх гомдлоо зохих шатны прокурорт гаргах зохицуулалттай байна.

Иймд, “А” хуулийн этгээдээс гаргасан гомдлыг “Захиргааны хэргийн шүүхийн харьяаллын бус” үндэслэлээр хүлээн авахаас татгалзаж шийдвэрлэлээ.

Санамж:

Энэ тойм нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүгчийн захирамж /шүүхийн тогтоол/-ийг олон нийтэд ойлгомжтой байдлаар мэдээлэн хүргэх зорилготой болно.

Тойм бэлтгэсэн: Нийслэл дэх Захиргааны хэргийн анхан шатны шүүхийн Ерөнхий шүүгч Т.Мөнх-Эрдэнэ