Шүүхийн шийдвэрийн огноо, дугаар: 2025.05.19-ний өдрийн 128/ШШ2025/0374

Шийдвэрийн төлөв: Хүчин төгөлдөр болсон

   “Б” ХХК-д дампын оператороор ажиллаж байсан Г нь уурхайн амралтын байранд амарч байх үедээ өвчний улмаас нас барсан болох нь тогтоогджээ.

   Тус компанийн үйлдвэрлэлийн осол, хурц хордлогыг судлан бүртгэх орон тооны бус байнгын комиссоос ослын тохиолдлыг судлан бүртгээд “...ажлын бус цагаар, амрах байранд зүрхний шигдээс оношоор нас барсан...” үндэслэлээр үйлдвэрлэлийн осолд тооцохоос татгалзсан акт үйлдсэнийг Өмнөговь аймгийн Мэргэжлийн хяналтын газрын Хөдөлмөрийн хяналтын улсын байцаагч баталгаажуулсан байна.

  Иргэний гаргасан гомдлоор Гэр бүл, хөдөлмөр, нийгмийн хамгааллын яамны Салбарын улсын ерөнхий байцаагчаас маргаан бүхий тохиолдлыг хянаад Засгийн газрын 2015 оны 269 дүгээр тогтоолоор баталсан “Үйлдвэрлэлийн осол, хурц хордлогыг судлан бүртгэх дүрэм”-ийн 2.1.4-т заасан ослын тохиолдолд хамаарна гэсэн шийдвэр гаргаж, тус шийдвэрийг эс зөвшөөрч “Б” ХХК шүүхэд нэхэмжлэл гаргажээ.

   Шүүхээс “Б” ХХК-ийн гаргасан нэхэмжлэлийг бүхэлд нь хэрэгсэхгүй болгож шийдвэрлэсэн.

     1. Ажил олгогчийн хяналтад байх бүхий л байрыг ажлын байранд тооцох тул амралтын байрыг ажлын байр гэж ойлгоно.

     2. Үйлдвэрлэлийн осол гэдгийг зөвхөн ажил үүргээ гүйцэтгэж байх тохиолдлоор хязгаарлахгүй, амралтын өрөөнд амарч байхад үүссэн тохиолдлыг ч үйлдвэрлэлийн осолд тооцно.

     3. Ажлын байранд гарсан үйлдвэрлэлийн ослын хувьд ажилтан хөдөлмөрийн аюулгүй ажиллагааны горимыг санаатай зөрчсөн, согтууруулах ундаа мансууруулах бодис хэрэглэсний улмаас осолд өртсөн, эсхүл гэмт хэрэг үйлдэх үед өөрийн биед гэмтэл учруулснаас бусад тохиолдлыг үйлдвэрлэлийн осол гэж үзнэ.

   Маргааны энэ тохиолдолд, “Б” ХХК-ийн уурхайн амрах хотхоны амралтын өрөөнд ажилтан Г нь зүрхний шигдээсээр нас барсан, тухайн амралтын өрөөг ажлын байр гэж ойлгох тул үйлдвэрлэлийн осолд тооцсон хариуцагчийн шийдвэр үндэслэлтэй гэж үзэв.

Санамж:

Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

Шүүхийн шийдвэрийг бүрэн эхээр нь үзэх холбоос:

https://shuukh.mn/single_case/18825?daterange=2025-01-01%20-%202026-04-24&id=1&court_cat=3&bb=1 

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч Т.Гангэрэл