Монголын Хуульчдын холбооны ерөнхийлөгчийн нэрэмжит “MOCK TRIAL-2023” ШҮҮХИЙН МЭТГЭЛЦЭЭНИЙ ТЭМЦЭЭН 2023 оны 12 дугаар сарын 16-ны өдөр хууль зүйн их, дээд сургуулиудын оюутнуудын дунд захиргааны хэрэг хянан шийдвэрлэх чиглэлээр тус шүүхийн нэгдсэн байранд 9 сургуулийн 9 баг оролцож, ур чадвар, мэдлэгээ сорин өрсөлдөхөд МУИС-Хууль зүйн сургуулийн баг тэргүүн байр эзэллээ.  

       Их сургуулийн оюутнуудыг тухайн сургууль тус бүрээс багш нар хариуцан удирдан оролцуулж,  Нийслэл дэх захиргааны хэргийн анхан шатны шүүхийн шүүгч Б.Адъяасүрэн, У.Бадамсүрэн, Л.Батбаатар, С.Ганбат, Ц.Мөнзул, С.Отгонтуяа, Д.Чанцалням, Д.Эрдэнэчимэг, Захиргааны хэргийн давж заалдах шатны шүүхийн шүүгч З.Ганзориг, Д.Оюумаа нар уг тэмцээний шүүгчээр оролцож, гурван үе шаттайгаар амжилттай зохион байгуулав.

       Энэхүү тэмцээн нь жил бүр хүрээгээ тэлсээр байгаа бөгөөд энэ жил оролцогч сургуулийн тоо нэмэгдсэний зэрэгцээ оюутнуудыг арбитрын хэргийн мэтгэлцээнээр өрсөлдөх боломжийг олгосноороо онцлог болсон байна.

 НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХ