Монгол Улсад Захиргааны хэргийн дагнасан шүүх байгуулагдсаны 20 жилийн ой тохиож байгаатай холбогдуулж Нийслэл дэх Захиргааны хэргийн анхан шатны шүүхийн Тамгын газраас санаачлан хууль зүйн их, дээд сургуулийн оюутнуудад тус шүүхийн шүүгч нар өөрсдийн шийдвэрлэж, хуулийн хүчин төгөлдөр болсон сонирхолтой кэйсүүдийг тайлбарлаж, ярилцах хөтөлбөрийн хүрээнд “Захиргааны хэргийн шүүх - Кейс судлал” 4 удаагийн цуврал уулзалт, ярилцлага зохион байгуулахаар төлөвлөсөн.

   Энэхүү төлөвлөгөөний дагуу 2024 оны 03 дугаар сарын 22-ны өдөр Захиргааны хэргийн давж заалдах шатны шүүх хуралдааны танхимд эхний ээлжийн 16 их сургуулийн (МУИС, ДХИС, СЭЗИС, Шихихутаг Их сургууль, Их засаг их сургууль, Монгол Улсын Эрдмийн их сургууль, Отгонтэнгэр их сургууль,  Глобал удирдагч их сургууль, Боловсрол, соёл, эрх зүйн дээд сургууль, Рояал их сургууль, Олон Улсын Улаанбаатар их сургууль, Идэр их сургууль, Үндэсний техникийн их сургууль, Сити их сургууль, Орхон их сургууль) Эрх зүйн 1-5 дугаар курсын нийт 104 оюутнуудыг хүлээн авч “ЗХШ-Кейс судлал” уулзалт, ярилцлагыг зохион байгууллаа.

   Тус өдөр Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ “Дахин төлөвлөлтийн төсөл дэх захиргааны гэрээ ба улсын бүртгэл”, “Татварын хяналт шалгалтын хөөн хэлэлцэх хугацааг тоолох журам” сэдвүүдээр тус тус оюутнуудад тайлбарлаж, ярилцлаа.

   Дээрх сэдвүүдийн хүрээнд татварын маргаан, тэр дундаа нөхөн ногдуулалтын акт, хөөн хэлэлцэх хугацааг хэрхэн тоологдох талаар, дахин төлөвлөлтийн төсөлтэй холбоотойгоор иргэд, байгууллага болон захиргааны байгууллагын хооронд үүссэн захиргааны акттай холбоотой маргааныг тус тус шүүх хэрхэн шийдвэрлэснийг нийтийн эрх зүй дэх зарчим болон зарим хууль хэрэглээтэй уялдуулан тайлбарлав.

   Уг уулзалт, ярилцлагын төгсгөлд оюутнууд “Захиргааны хэргийн шүүх – Кейс судлал”-тай холбоотойгоор манай шүүхээс тогтмол зохион байгуулдаг үйл ажиллагаанд хамрагдах хүсэлтээ илэрхийлэв.

   Эхний ээлжийн “ЗХШ-Кейс судлал” уулзалт, ярилцлагад өөрийн цагаа гарган ирж, идэвхтэй оролцсон нийт оюутнууддаа талархал илэрхийлье.

НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХИЙН ТАМГЫН ГАЗАР