Нийслэл дэх захиргааны хэргийн анхан шатны шүүхийн 2024.07.04-ний өдрийн №128/ШШ2024/0565 шийдвэр

      Шийдвэрийн төлөв: Хүчин төгөлдөр болсон.

     Иргэн Б иргэний үнэмлэхээ гээгдүүлэн дахин шинээр авахаар ирүүлсэн үйлдэлд Улсын бүртгэгч нь Зөрчлийн тухай хуулийн 15.24 дүгээр зүйлийн 4 дэх хэсгийг үндэслэн 30,000 төгрөгөөр торгох шийтгэл оногдуулжээ.

     Дүүргийн прокуророос дээрх улсын бүртгэгчийн шийтгэлийн хуудсыг хянаад хүчингүй болгуулахаар Прокурорын дүгнэлт үйлдэж шүүхэд ирүүлсэн.

     Зөрчлийн тухай хуулийн 15.24 дүгээр зүйлийн 4-т “Иргэний улсын бүртгэлийн талаар тогтоосон журам зөрчсөн бол хүнийг гучин нэгжтэй тэнцэх хэмжээний төгрөгөөр, хуулийн этгээдийг гурван зуун нэгжтэй тэнцэх хэмжээний төгрөгөөр торгоно” гэсэн заалт нь Хууль зүй, дотоод хэргийн сайдын А/207 дугаар тушаалаар баталсан Иргэний Улсын бүртгэл хөтлөх журмыг зөрчсөн зөрчлүүд тухайлбал, хэн нэг этгээдийн иргэний үнэмлэхийг хадгалах үүрэг хүлээсэн этгээд уг иргэний үнэмлэхийг гээгдүүлж, үрэгдүүлсэн тохиолдолд шийтгэл ногдуулахаар зохицуулсан.

      Харин Иргэний улсын бүртгэл хөтлөх журмын 8.8-д “Иргэн иргэний үнэмлэхээ гээсэн, үрэгдүүлсэн, гэмтээсэн бол иргэний үнэмлэхийг дахин олгоход ... иргэний үнэмлэхийг цахим мэдээллийн санд хүчингүй болгосон хяналтын улсын байцаагчийн дүгнэлтэд үндэслэнэ.” гэж иргэний үнэмлэхийг дахин олгох харилцааг зохицуулсан байна.

     Ийнхүү холбогдох журамд заасан иргэний үнэмлэхийг дахин олгох зохицуулалтыг буруу хэрэглэн, иргэний үнэмлэхээ гээгдүүлсэн иргэнд иргэний үнэмлэх эзэмших, хадгалах үүргээ зөрчсөн этгээдэд хүлээлгэх шийтгэлийг ногдуулсан Улсын байцаагчийн шийтгэлийн хуудсыг хүчингүй болгохоор ирүүлсэн Прокурорын дүгнэлтийг  үндэслэлтэй гэж  үзсэн.

    Тодруулбал, иргэний улсын бүртгэлийн талаар тогтоосон журам зөрчсөн гэх зөрчилд иргэн өөрийн иргэний үнэмлэхийг гээгдүүлсэн, үрэгдүүлсэн үйлдэл хамаарахгүй гэж шүүх дүгнэсэн болно.

 Шүүхийн шийдвэрийг бүрэн эхээр нь үзэх холбоос:  https://shuukh.mn/single_case/16376?start_date=&end_date=&id=1&court_cat=3&bb=1

Тоймыг бэлтгэсэн: Нийслэл дэх Захиргааны хэргийн анхан шатны шүүхийн шүүгч Х.Нямдэлгэр