Шүүгчийн захирамжийн огноо, дугаар: 2025.01.03-ны өдрийн 128/ШЗ2025/0235

      Захирамжийн төлөв: Хүчин төгөлдөр болсон

      2025.01.15 Процессын тойм-1

    Иргэн Э-г Монгол Улсын Их хурлын 2024 оны ээлжит сонгуулийн зардлын зарцуулалтын явцын тайланг Үндэсний аудитын газарт ирүүлээгүй зөрчил гаргасан гэж үзэж, 2024 оны 11 дүгээр сарын 06-ны өдрийн ҮҮ дугаар шийтгэлийн хуудсаар Зөрчлийн тухай хуулийн 17.1 дүгээр зүйлийн 27 дахь хэсэгт заасны дагуу 20 000 000 (хорин сая) төгрөгийн торгууль ногдуулсан байна.

     Тиймээс тэрээр эрх бүхий албан тушаалтны гаргасан 2024 оны 11 дүгээр сарын 06-ны өдрийн ҮҮ дугаар шийтгэлийн хуудсыг хүчингүй болгуулахаар шүүхэд ханджээ.

     Шүүх Захиргааны хэрэг шүүхэд хянан шийдвэрлэх тухай хуулийн 11 дүгээр зүйлийн 11.2 дахь хэсэгт “Хэрэг хянан шийдвэрлэхэд хэрэглэх хууль, Монгол Улсын олон улсын гэрээ нь Монгол Улсын Үндсэн хуульд нийцээгүй байна гэж шүүгч, шүүх бүрэлдэхүүн үзвэл тухайн хэрэг хянан шийдвэрлэх ажиллагааг түдгэлзүүлж, Улсын дээд шүүхэд энэ талаар саналаа гаргана.” гэж зааснаар хэргийг хянан шийдвэрлэхэд хэрэглэх хууль болох Зөрчлийн тухай хуулийн 17.1 дүгээр зүйлийн 27 дахь хэсгийн “... хүнийг хорин мянган нэгжтэй тэнцэх ... төгрөгөөр торгоно” гэх хэсэг нь Монгол Улсын Үндсэн хуулийн Нэгдүгээр зүйлийн 2 дахь хэсгийн “... шударга ёс, ... хууль дээдлэх нь төрийн үйл ажиллагааны үндсэн зарчим мөн.”, Арван зургадугаар зүйлийн 9 дэх хэсгийн “... Төрийн байгууллагад ... сонгогдох эрхтэй ...”, Далдугаар зүйлийн 1 дэх хэсгийн “Үндсэн хуульд хууль ... бүрнээ нийцсэн байвал зохино.” гэсэнд нийцээгүй талаар үндэслэл бүхий саналыг гаргаж Монгол Улсын дээд шүүхэд хүргүүлэхээр тогтов.

     Иймд, Захиргааны хэрэг шүүхэд хянан шийдвэрлэх тухай хуульд заасны дагуу “хэрэглэх хууль Үндсэн хуульд нийцээгүй тухай асуудлаар Улсын дээд шүүхэд санал оруулсан” үндэслэлээр хэрэг хянан шийдвэрлэх ажиллагааг түдгэлзүүлж шийдвэрлэлээ.

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ