Шүүхийн шийдвэрийн огноо, дугаар: 2024 оны 09 дүгээр сарын 11-ний өдрийн 128/ШШ2024/0687

Шийдвэрийн төлөв: Хүчин төгөлдөр болсон

   Нийтийн тээврийн бодлогын газрын автотээврийн хяналтын улсын байцаагч Х нь “ТФ” ХХК-ийн жолооч нар “Хүнсний түргэн муудах, эмзэг бүтээгдэхүүнийг тээвэрлэхэд тавих ерөнхий шаардлага” MNS 5343:2011 улсын стандартын 9.1, 7.2.2-т заасан нөхцөл шаардлагыг зөрчин хөлдүү тахианы мах болон бусад бүтээгдэхүүн тээвэрлэж байсан зөрчлийг илрүүлж торгох шийтгэл ногдуулжээ.

   Үүнийг эс зөвшөөрч “ТФ” ХХК шүүхэд нэхэмжлэл гаргаж “...жолооч нь компанитай гэрээ байгуулаагүй, ачаа тээврийн үйлчилгээ эрхлэгч этгээд биш, Иргэний хуульд заасан тээвэрлэлтийн гэрээ байгуулаагүй...” гэх үндэслэлээр маргасан.

   Зөрчлийн тухай хуулийн 14.6 дугаар зүйлийн 3.“Тээвэрлэгч нь ачаа, зорчигчийг тээвэрлэлтийн нөхцөл, техникийн шаардлага хангасан зориулалтын тээврийн хэрэгслээр тээвэрлээгүй бол ... хуулийн этгээдийг нэг мянга таван зуун нэгжтэй тэнцэх хэмжээний төгрөгөөр торгоно.”, 9.“Хуульд заасны дагуу эрх бүхий байгууллагаас гаргасан нийтээр дагаж мөрдөх дүрэм, журам зөрчсөн бол учруулсан хохирол, нөхөн төлбөрийг гаргуулж хүнийг хорин таван нэгжтэй тэнцэх хэмжээний төгрөгөөр, хуулийн этгээдийг хоёр зуун тавин нэгжтэй тэнцэх хэмжээний төгрөгөөр торгоно”,

   Хүнсний түргэн муудах, эмзэг бүтээгдэхүүнийг тээвэрлэхэд тавих ерөнхий шаардлага MNS5343:2011  стандартын 6.1-д “Хүнсний түргэн муудах, эмзэг бүтээгдэхүүнийг техникийн бүрэн бүтэн байдал, хөдөлгөөний болон экологийн аюулгүйн шаардлагуудыг бүрэн хангасан, тусгай зориулалтын битүү тэвш бүхээг бүхий зориулалтын тээврийн хэрэгслээр тээвэрлэх”, 9.1-д “Тээврийн хэрэгслийн жолооч нь тухайн ангиллын мэргэшсэн жолооч байна” гэж тус тус заасан.

   ТФ ХХК нь нийслэлийн 6 дүүрэгт 19 салбартай, хүн амд хүнсний бүтээгдэхүүн нийлүүлэх үйлчилгээ үзүүлдэг, энэхүү үйлчилгээгээ хэвийн явуулахын тулд агуулахаасаа хөлдүү мах махан бүтээгдэхүүн, бусад хүнсний бүтээгдэхүүн байнга тээвэрлэдэг этгээд болохын хувьд дээр дурдсан хууль болон стандарт шаардлагыг чанд мөрдөх үүрэгтэй.

   Тодруулбал, хөлдүү мах, махан бүтээгдэхүүн бусад хүнсний бүтээгдэхүүнийг тээвэрлэж буй этгээд хэн боловч хууль, стандартыг мөрдөхгүйгээр “ачаа тээврийн үйлчилгээ хэрэглэгч этгээд биш, гэрээ байгуулагдаагүй” гэх үндэслэлээр хууль тогтоомжид заасан үүргээс чөлөөлөгдөх учиргүй, энэ тохиолдолд тээвэрлэлтийн гэрээ байгуулагдсан байхыг шаардахгүй гэж үзэж шүүхээс “ТФ” ХХК-ийн гомдлын шаардлагыг хэрэгсэхгүй болгож шийдвэрлэв.

Шүүхийн шийдвэрийг бүрэн эхээр нь үзэх холбоос:

https://shuukh.mn/single_case/17287?daterange=2024-09-11%20-%202024-09-11&id=1&court_cat=3&bb=1     

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч Г.Урангуа