Шүүгчийн захирамжийн огноо, дугаар: 2025.05.07-ны өдрийн 128/ШЗ2025/3058

Захирамжийн төлөв: Хүчин төгөлдөр болсон

2025.06.18 Процессын тойм

   Нэхэмжлэгч Х компаниас Байгаль орчин, уур амьсгалын өөрчлөлтийн сайдын 2024 оны 02 дугаар сарын 29-ний өдрийн А/101 дугаар “Хуш модны самрын идээний гарцыг тогтоох тухай тушаал”-ыг хүчингүй болгуулахаар маргасан.

   Хэрэг хянан шийдвэрлэх ажиллагааны явцад маргаан бүхий “Хуш модны самрын идээний гарцыг тогтоох тухай” тушаалыг Байгаль орчин, уур амьсгалын өөрчлөлтийн сайдын 2025 оны 03 дугаар сарын 06-ны өдрийн А/103 дугаар тушаалаар хүчингүй болгож, уг тушаалын 2 дахь заалтаар идээний гарцыг тогтоох асуудлаар нэгдсэн шийдэлд хүрч холбогдох саналыг 2025 оны хоёрдугаар улиралд багтаан танилцуулахыг Байгалийн нөөцийн бодлогын хэрэгжилтийн газарт даалгажээ.

   Үүний дараа нэхэмжлэгчээс Байгаль орчин, уур амьсгалын өөрчлөлтийн сайдад холбогдуулан “Хуш модны самрын идээний гарцыг дахин тогтоохдоо судалгаа шинжилгээний үндэслэлтэйгээр бодит байдалд нийцүүлэн холбогдох хууль, журмын дагуу захиргааны акт гаргахыг даалгах” гэж нэхэмжлэлийн шаардлагаа ихэсгэсэн байна.

   Гэвч хариуцагчаас хуш модны самрын идээний гарцыг тогтоохтой холбоотой асуудлыг шийдвэрлэхгүй гэж татгалзсан шийдвэр гаргаагүй, мөн нэхэмжлэгч дахин шийдвэр гаргуулах талаар хариуцагчид хүсэлт гарган хандаагүй болох нь тогтоогдсон.

   Даалгах нэхэмжлэл нь хариуцагчийн хууль бус эс үйлдэхүй, эсхүл татгалзсан шийдвэр байгаа тохиолдолд хэрэгждэг бөгөөд энэ тохиолдолд нэхэмжлэгчээс захиргааны байгууллагад ямар нэг захиргааны акт гаргахаар хандаагүй, тиймээс захиргааны акт гаргахгүй байгаа эс үйлдэхүй болон татгалзсан шийдвэр байхгүй байхад шүүхээс даалгаж шийдвэрлэх боломжгүй тул нэхэмжлэлийн ихэсгэсэн шаардлагыг шүүх хүлээн авах үндэслэлгүй гэж үзэв.

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ