Төрийн албаны тухай /шинэчилсэн найруулга/ хуульд Монгол Улсын иргэн төрийн захиргааны албанд анх орохдоо Төрийн захиргааны албан хаагчийн тангараг өргөнө хэмээн заасанчлан төрийн албаны ерөнхий шалгалт өгч тэнцэн өөрсдийн эрхэлж буй албан тушаалын чиг үүрэг, түүнд тавигдах шаардлагыг ханган ажиллаж байгаа шүүхийн захиргааны албан хаагчдын тангараг өргүүлэх ёслолын арга хэмжээ Шүүхийн Ерөнхий Зөвлөлийн танхимд боллоо.

Нийслэл дэх Захиргааны хэргийн анхан шатны шүүхийн тамгын газрын шүүх хуралдааны нарын бичгийн дарга Б.Батжаргал, Н.Амарзаяа, Ш.Жаргалмаа, Б.Төгөлдөр, Б.Энхжаргал нар “Эх орон ард түмнийхээ  төлөө эрдэм чадлаа зориулж, төрийн хууль, ёс зүйн хэм хэмжээг чанд сахиж, албан үүргээ үнэнч шударгаар биелүүлэх”-ээ тангараглаж алтан соёмбот тугтаа мөргөн адис авч, тангаргийн хуудсанд гарын үсгээ зурлаа.

Ийнхүү төрийн албан хаагчийн тангараг өргөж, улс орон, ард түмнийхээ төлөө үнэнчээр зүтгэх чин хүслээр дүүрэн байгаа албан хаагчдаа баяр хүргэж, ажлын амжилт хүсье.