Шүүгчийн захирамжийн огноо, дугаар: 2026.02.25-ны өдрийн 128/ШЗ2026/1761

Захирамжийн төлөв: Хүчин төгөлдөр болоогүй

2026.03.04 Процессын тойм

   Нэхэмжлэгч Х компани Татварын ерөнхий газрын дэргэдэх татварын Маргаан таслах зөвлөлийн тогтоол болон Татварын ерөнхий газрын харьяа Том татвар төлөгчийн газрын татварын хяналт шалгалтын хэлтсийн татварын улсын байцаагч нарын нөхөн ногдуулалтын актыг тус тус хүчингүй болгуулах нэхэмжлэлийн шаардлага гаргаж, эдгээр захиргааны актын биелэлтийг түдгэлзүүлэх хүсэлт ирүүлсэн.

   Нэхэмжлэгч хүсэлтийн үндэслэлээ “...түдгэлзүүлэхгүй нөхцөлд дахин шалгалт явуулна, энэ нөхцөлд нэхэмжлэгчийн үйл ажиллагааг хэвийн явагдахад хүндрэл учруулна, эрх, хууль ёсны ашиг сонирхол ноцтой зөрчигдөж болзошгүй” гэж тайлбарласныг хариуцагч эс зөвшөөрч “...нэхэмжлэгч компанид татварын иж бүрэн хяналт шалгалт эхлүүлсэн...түдгэлзүүлж болохгүй” гэж тайлбарлав.  

   Шүүх захиргааны актын биелэлтийг нэхэмжлэгчид эрх зүйн түр хамгаалалт шаардлагатай эсэхийг шалгаж тогтоосны үндсэн дээр Захиргааны хэрэг шүүхэд хянан шийдвэрлэх тухай хуулийн 62 дугаар зүйлд заасан “түдгэлзүүлж болохгүй тохиолдол”-уудад хамаарахгүй нөхцөлд хэрэгжүүлнэ.

   Энэ маргааны тухайд, татварын улсын байцаагчийн гаргасан “Нөхөн ногдуулалтын акт” болон Татварын маргаан таслах зөвлөлийн тогтоол нь агуулгын хувьд Захиргааны хэрэг шүүхэд хянан шийдвэрлэх тухай хуулийн 62 дугаар зүйлийн 62.1.2-т заасан “хүн, хуулийн этгээдээс албан татвар...гаргуулах тухай шийдвэр”-т хамаарч байх тул түүний биелэлтийг түдгэлзүүлж болохгүй гэж үзнэ.

   Иймд шүүхээс захиргааны актын биелэлтийг түдгэлзүүлэх тухай хүсэлтийг хэрэгсэхгүй болгож шийдвэрлэв.

Санамж:

Энэ тойм нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүгчийн захирамж /шүүхийн тогтоол/-ийг олон нийтэд ойлгомжтой байдлаар мэдээлэн хүргэх зорилготой болно.

ТОЙМ БЭЛТГЭСЭН: НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХИЙН ШҮҮГЧ Н.ДУЛАМСҮРЭН