Нийслэл дэх Захиргааны хэргийн анхан шатны шүүхийн Тамгын газар болон Ахмадын салбар зөвлөл нь 2026 оны 05 дугаар сарын 08-ны өдөр Сэлэнгэ, Хэнтий аймгийн ахмад шүүгч нарыг Захиргааны хэргийн шүүхийн нэгдсэн байранд хүлээн авч уулзав. Тус уулзалтанд Шүүхийн ерөнхий зөвлөлийн Захиргаа удирдлагын газрын дарга Л.Санжрагчаа, Нийслэл дэх Захиргааны хэргийн анхан шатны шүүхийн Ерөнхий шүүгч Т.Мөнх-Эрдэнэ, Тамгын газрын дарга Н.Батхүү, Шүүхийн ахмадуудын холбооны Удирдах зөвлөлийн гишүүн Б.Сарантуяа, Д.Тайванхүү, Д.Дамдин-Од, Нийслэл дэх Захиргааны хэргийн анхан шатны шүүхийн Ахмадын салбар зөвлөлийн тэргүүн Ц.Батсүрэн болон гишүүд, Хэнтий, Сэлэнгэ аймгийн ахмад шүүгч нар оролцлоо.

   Уулзалтыг Нийслэл дэх Захиргааны хэргийн анхан шатны шүүхийн Ерөнхий шүүгч Т.Мөнх-Эрдэнэ нээж, ШЕЗ-ийн Захиргаа удирдлагын газрын дарга Л.Санжрагчаа шүүхийн төсөв, шинээр баригдаж буй барилга, байгууламжийн ажлын явц болон нийгмийн хамгаалалын талаар хэрэгжүүлж байгаа бодлого, зорилтын талаар, Нийслэл дэх Захиргааны хэргийн анхан шатны шүүхийн Зохион байгуулалтын хэлтсийн дарга Ц.Оюун-Эрдэнэ тус шүүхийн үйл ажиллагаа болон шийдвэрлэсэн хэргийн стастистик тоон мэдээллийн талаар тус тус мэдээлэл өглөө.

   Ахмад шүүгч нар Ногоон танхим болон НДЗХАШШ-ийн байр, Ахмадын салбар зөвлөлийн өрөөгөөр зочилж, тус шүүхийн Ахмадын салбар зөвлөлийн тэргүүн Ц.Батсүрэн Салбар зөвлөлийн үйл ажиллагаа болон арга туршлагаа танилцуулснаар танилцах уулзалт амжилттай өндөрлөлөө.

НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХИЙН ТАМГЫН ГАЗАР