Нийслэлийн ерөнхий боловсролын 147 дугаар сургуулийн 10,11,12 дүгээр ангийн сурагчид  Нийслэл дэх Захиргааны хэргийн анхан шатны шүүхийн байр, шүүхийн өдөр тутмын үйл ажиллагаатай танилцлаа.

    Сурагчдыг Олон нийттэй харилцах мэргэжилтэн Б.Төгсбуянжаргал хүлээн авч Нийслэл дэх Захиргааны хэргийн анхан шатны шүүхэд ирүүлсэн хэрэг, нэхэмжлэл, өргөдөл, гомдлыг хүлээн авах, хуваарилах үйл явц болон Шүүхийн үүсэл хөгжил, бүтэц, орон тоо, шүүхээс иргэдэд үзүүлдэг үйлчилгээнүүдийн талаар мэдээллийг өгч шүүхийн байрны 1-3 давхарт байрлах шүүх хуралдааны танхим болон шүүхийн захиргааны ажилтнуудын ажиллах орчинтой танилцууллаа.

      Үүний дараа Нийслэл дэх Захиргааны хэргийн анхан шатны шүүгч А.Ганзориг сурагчдыг хүлээн авч уулзаж,  шударгаар шүүлгэх эрх, хуулийн өмнө эрх тэгш байх, ёс зүй, шүүхийн чиг үүрэг, шүүгчийн ажил мэргэжил, Үндсэн хууль, хүний эрх, хууль дээдлэх зарчим хийгээд мэргэжил сонголтын талаар ярилцсан юм. Сурагчдын зүгээс хууль хэрэглээний талаар болон мэргэжлээ хэрхэн зөв сонгох, шүүгч болоход цаашид юуг анхаарах, талаар тодруулан асууж хариулт авлаа.

      Шүүхийн үйл ажиллагаатай танилцсаны дараа сурагчид шүүхийн байгууллага, шүүгчийн албан тушаалын чиг үүргийн талаар тодорхой мэдээлэл олж авсан бөгөөд шүүхийн тогтолцоо, ажил мэргэжлийн онцлогийн хүрээнд мэдлэгээ бататгаж, мэргэжил сонгоход онцгой ач холбогдолтой уулзалт болсныг онцолсон юм.

НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХИЙН ТАМГЫН ГАЗАР