Нийслэл дэх Захиргааны хэргийн анхан шатны шүүхийн Тамгын газар МУИС-ийн Хууль зүйн сургуультай  жил бүр хамтран ажиллах гэрээ байгуулан оюутнууд дадлагажуулдаг уламжлалтай.  Өнөөдрийн байдлаар тус шүүхэд МУИС-ийн Хууль зүйн сургуулийн 15 оюутан дадлагажиж байна. Тус шүүхийн Тамгын газраас дадлагажигч оюутнуудад зориулан “Шүүхтэй танилцах” ажил зохион байгууллаа. Энэ ажлын хүрээнд оюутнуудад шүүхийн шинэчлэл, ил тод нээлттэй байдал, шүүхийн өдөр тутмын үйл ажиллагаа болон тус шүүхэд хэрэгжүүлэн ажиллаж буй “Цахим хөтөч”, “Хэргийн хөдөлгөөний удирдлагын хэсэг, “чат бот”, “Медиа хөтөч” зэргийн талаар мэдээлэл өгч, шүүх хуралдааны жишиг танхим болох “Ногоон танхим”-тай танилцууллаа.

Эдгээр оюутнууд 16 долоо хоногийн турш тус шүүхэд дадлагажна. Энэ хугацаандаа шүүхээс хэрэг хянан шийдвэрлэхэд явуулах ажиллагаа тус бүрд биечлэн оролцож, танхимын сургалтаар олж авсан мэдлэгээ бататгаж авдгаараа давуу талтай.

Мөн дадлагын хугацаанд шүүгчээс гарах эрхийн актууд болон захиргааны хэрэг үүсгэхээс татгалзах тухай, нэхэмжлэлийн бүрдүүлбэр хангуулахаар хугацаа тогтоох тухай, нэхэмжлэлийг буцаах тухай, захиргааны хэрэг үүсгэх тухай, шүүх хуралдааныг товлон зарлах тухай, хэрэг хянан шийдвэрлэх ажиллагааг түдгэлзүүлэх тухай, шүүхийн шийдвэрийг албадан биелүүлэх зэрэг шүүгчийн захирамж, шүүхийн тогтоол, шүүхийн шийдвэрүүдийн төсөл боловсруулах ажлыг биечлэн хийж, суралцаж байна.

Тус шүүхэд 2020 оны байдлаар МУИС-ийн Хууль зүйн сургууль, Их, Засаг их сургууль, Шихихутуг их сургууль, Отгонтэнгэр их сургууль, Түшээ хууль зүйн дээд сургууль, Дотоод хэргийн их  сургууль зэрэг сургуулийн 46 оюутан амжилттай дадлагажсан байна. Оюутнууд курс, дамжаанаасаа шалтгаалаад харилцан адилгүй хугацаанд үйлдвэрлэлийн дадлага хийдэг. Тухайлбал, 2, 3 дугаар дамжааны оюутнууд танилцах дадлагаа 7-14 хоног хийдэг бол төгсөх ангийн оюутнууд үйлдвэрлэлийн дадлагаа 3 сар гаруй хугацаанд, магистрт сурч буй оюутнууд мэргэжлийн дадлагаа 7 хоног тус тус хийдэг.