Нийслэл дэх Захиргааны хэргийн анхан шатны шүүхийн Тамгын газар Чингэлтэй дүүргийн Тамгын газрын Хууль, эрх зүйн хэлтэстэй хамтран “Шүүхийн иргэдийн төлөөлөгчдөд зориулсан сургалт” зохион байгуулав. Сургалтыг шүүхийн Үйлчилгээний хэлтсийн дарга С.Одмаа удирдан явууллаа.  Сургалтын үеэр Сүхбаатар дүүргээс сонгогдсон иргэдийн төлөөлөгчдөд урилга хүргүүлж Захиргааны шүүхийн онцлог, Шүүхийн иргэдийн төлөөлөгч гэж хэн бэ, шүүхийн иргэдийн төлөөлөгчийн оролцоо, эрх, үүрэг, ач холбогдол, иргэдийн төлөөлөгчид олгох цалин хөлсний талаар мэдээлэл өгч, танилцуулга, гарын авлага тараав.

Мөн хууль сурталчлах ажлын хүрээнд Сүхбаатар дүүргийн Засаг даргын тамгын газрын дэргэдэх “Нэг цэгийн үйлчилгээний төв”-д хууль сурталчлах өдөрлөг зохион байгуулсан юм. Өдөрлөгийн үеэр Олон нийттэй харилцах мэргэжилтэн Ж.Амаржаргал, шүүгчийн туслах С.Мөнх-Эрдэнэ, мэдээллийн технологийн мэргэжилтэн М.Зоригтзаяа нар иргэдийн сонирхсон асуултад хариулт өгч, шүүхийн иргэдийн төлөөлөгчийн гарын авлага, Захиргааны ерөнхий хуулийн танилцуулга бүхий 7 төрлийн брошюр, Нийслэл дэх захиргааны хэргийн анхан шатны шүүхийн танилцуулга тарааж  ажиллалаа.

Дашрамд дуулгахад, Тус шүүх нь 2020 онд нийт 767 иргэдийн төлөөлөгчийн нэрсийг батлуулж, дэлхий нийтэд тархсан цар тахлын /Ковид өвчний/ улмаас сургалт хийх боломжгүй байсан тул нэрс нь батлагдсан иргэдийн төлөөлөгчид ил захидал, иргэдийн төлөөлөгчийн танилцуулга мэдээлэл хүргүүлээд байсан юм.