Тус шүүхийн Тамгын газрын даргын тушаалаар “Хэрэг хянан шийдвэрлэх ажиллагааны хугацаа хэтрэлт, түүний шалтгаан нөхцөл”-ийг тодруулах зорилгоор судалгааны ажлын хэсэг байгуулж, ажлын хэсгээс шүүгч болон шүүхийн захиргааны ажилтнуудад судалгааны үр дүнг тайлагналаа.

Судалгааны ажлын хэсгийг төлөөлж ажлын хэсгийн ахлагч, шүүхийн үйлчилгээний хэлтсийн дарга С.Одмаа танилцуулсан юм. Тэрээр тайлангийн эхэнд “Энэхүү судалгааг хугацаа хэтрэлтийн шалтгаан нөхцөлийг шүүхээс болон хэргийн оролцогчоос шалтгаалсан тоон үзүүлэлтийг харьцуулах бус хугацаа хэтрэхэд нөлөөлж буй шалтгаан нөхцөлийг олж тогтоон, үндэслэлийг арилгах ямар арга хэмжээ авч хэрэгжүүлэх шаардлагатай эсэхэд чиглэж судаллаа” гэв. Мөн шүүхээс хэрэг хянан шийдвэрлэх ажиллагааг хуулийн хугацаанд нь гүйцэтгэсэн эсэх, шүүх хуралдаанаар хойшилсон тохиолдолд хойшилсон үндэслэлийг арилгах арга хэмжээг дор бүр нь гүйцэтгэсэн эсэх, хэрэг хянан шийдвэрлэх ажиллагааны чухам аль үе шатанд хэргийн хугацааг алдаж байгаа, ямар ямар арга хэмжээг хэрэгжүүлснээр хугацаа хэтрэлт буурах боломжтойг судалгаагаар харуулахыг зорьсноороо өмнөх судалгаануудаас онцлог болжээ.

Энэ үеэр шүүгч, шүүхийн захиргааны ажилтнуудын зүгээс үр дүнд тулгуурлан гарч буй үр дагавар, шалтгаан нөхцөл бүрд авах арга хэмжээ, үндэслэлийг арилгахад бодитой санал оруулж ирж байгаа нь сайшаалтай, алдаа дутагдлыг арилгахад дөхөм сайн судалгаа болсон байна гэдгийг онцолж байв.