Татварын хууль тогтоомжийн шинэчлэлтэй холбоотой хууль хэрэглээ, ерөнхий ойлголтын талаар Нийслэл дэх Захиргааны хэргийн анхан шатны шүүх, Татварын ерөнхий газрын Хуулийн хэрэгжилтийг хангах газартай хамтарсан уулзалтыг зохион байгуулж, уулзалт ярилцлагад тус шүүхийн Ерөнхий шүүгч, бусад шүүгчид, Шүүхийн үйлчилгээний хэлтсийн даргын үүргийг түр орлон гүйцэтгэгч, мэргэжилтэн, шүүгчийн туслах нар, Татварын ерөнхий газрын Хуулийн хэрэгжилтийг хангах газрын дарга Д.Мөнхтамир, татварын улсын ахлах  байцаагч Д.Мөнхтуул, татварын улсын байцаагч Ш.Цогзолмаа, Б.Баттогтох, Х.Эрдэнэцогт нар оролцож санал бодлоо хуваалцлаа.

Уулзалтыг Ерөнхий шүүгч Ц.Батсүрэн нээж, сүүлийн 5 жилийн байдлаар татварын маргаантай холбоотой 658 нэхэмжлэл хүлээн авч, 492 хэргийг шийдвэрлэсэн ба  цаашид ч нэмэгдэх хандлагатай байгаа талаар дурдлаа.

Тус Шүүхийн үйлчилгээний хэлтсийн даргын үүргийг түр орлон гүйцэтгэгч  С.Одмаа тус шүүхээр шийдвэрлэгдсэн татварын маргаантай хэргийн тоон үзүүлэлтийн талаарх мэдээллийг болон татварын маргаантай хэрэгт гарч буй зарим асуудлын талаар товч танилцуулгыг хийсэн юм.

 Мөн Татварын ерөнхий газрын татварын улсын ахлах байцаагч Д. Мөнхтуул татварын хуулийн шинэчилсэн найруулгад орсон гол өөрчлөлт, Татварын ерөнхий хууль, Аж ахуйн нэгжийн орлогын албан татварын тухай хууль, Хувь хүний орлогын албан татварын тухай хуулийн хэрэгжилтийн талаар, татварын улсын ахлах байцаагч Ш.Цогзолмаа маргаан таслах зөвлөлийн үйл ажиллагаанд орсон шинэчлэлт өөрчлөлтийн талаар тус тус мэдээлэл өгч ажиллаа.

 Уулзалтын эцэст Татварын ерөнхий газрын хуулийн хэрэгжилтийг хангах газрын хамт олны зүгээс татварын эрх зүйн баримт бичгийн эмхэтгэл номыг тус шүүхийн Ерөнхий шүүгч, шүүгч, тамгын газарт гардуулснаар өндөрлөлөө.

НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХ