Монгол Улсын Шүүхийн тухай хуульд заасны дагуу 2021 онд тус шүүхэд иргэдийн төлөөлөгчөөр оролцох 637 иргэдийн төлөөлөгчийн нэрсийн жагсаалтыг баталгаажуулсан бөгөөд шүүхийн иргэдийн төлөөлөгчийн эрх зүйн байдлыг сурталчлах, мэдээлэх зорилгоор нийслэлийн 9 дүүргийн Засаг даргын Тамгын газартай хамтарч ажиллаа.

     Тодруулбал, нэрсийн жагсаалтаар батлагдсан 637 иргэдийн холбогдох гэрийн хаягаар иргэдийн төлөөлөгчөөр сонгогдсон тухай, иргэдийн төлөөлөгч гэж хэн болох, мөн цаашид шүүхэд иргэдийн төлөөлөгчөөр оролцох тохиолдолд хэрхэн оролцох талаарх ил захидал, гарын авлага болон zoom app-ын тусламжтайгаар цахимаар сургалт зохион байгуулах талаар сургалтын тов, холбогдох pass, id зэргийг хүргүүлж, 5 удаагийн давтамжтайгаар “Шүүхийн иргэдийн төлөөлөгчийн  эрх зүйн байдал” сэдэвт цахим сургалтыг амжилттай зохион байгууллаа.

     Энэхүү цахим сургалтыг Шүүхийн үйлчилгээний хэлтсийн даргын албан үүргийг түр орлон гүйцэтгэгч С.Одмаа удирдан явуулж, захиргааны хэргийн шүүхийн онцлог, шүүхийн иргэдийн төлөөлөгч гэж хэн болох, шүүхийн иргэдийн төлөөлөгчийн оролцоо, эрх, үүрэг, ач холбогдол, иргэдийн төлөөлөгчид олгох цалин хөлсний талаар мэдээлэл өгсөн бөгөөд иргэд интернэт, техник технологийн тусламжтайгаар өөрийн байгаа газраасаа хамрагдсанаараа өмнөх жилүүдэд зохион байгуулсан сургалтаас онцлог болж чадсан юм.

     Дэлхий нийтэд тархсан Коронавирус /covid-19/ цар тахал гарсан нөхцөл байдалтай холбогдуулан Монгол Улсын Засгийн газраас Гамшгаас хамгаалах өндөржүүлсэн болон бүх нийтийн бэлэн байдлын зэрэгт шат дараатайгаар шилжиж, иргэдийг олноор нь цугларуулах, сургалт зохион байгуулах үйл ажиллагааг хориглосон тул жил бүр зохион байгуулдаг шүүхийн иргэдийн төлөөлөгчдөд  зориулсан сургалтыг танхимаар явуулах боломжгүй байгааг дурдах нь зүйтэй.