“Латуун дохио” ТББ, “Монфемнет Үндэсний Сүлжээ” ТББ-уудаас Монгол Улсын Засгийн газарт холбогдуулан 2021 оны 06-р сарын 29-ний өдөр тус шүүхэд “Монгол Улсын Засгийн газрын 2021 оны 06 дугаар сарын 23-ны өдрийн 171 дүгээр тогтоолын 2 дахь заалтын “хурдан морины уралдаан” гэх хэсэг, 3 дахь заалтыг бүхэлд нь хүчингүй болгуулах” шаардлага бүхий нэхэмжлэл гаргасан бөгөөд  2021 оны 07 дугаар сарын 06-ны өдөр Захиргааны хэрэг шүүхэд хянан шийдвэрлэх тухай хуулийн 106 дугаар зүйлийн 106.3.3-д заасны дагуу нэхэмжлэлийн шаардлагаа “Монгол Улсын Засгийн газрын 2021 оны 06 дугаар сарын 23-ны өдрийн 171 дүгээр тогтоолын 2 дахь заалтын “хурдан морины уралдаан” гэх хэсэг 3 дахь заалтыг тус тус хууль бус байсан болохыг тогтоолгох” болгон өөрчилсөн байна.

     Нийслэл дэх Захиргааны хэргийн анхан шатны шүүх тус хэргийг 2021 оны 11 дүгээр сарын 02-ны өдрийн шүүх хуралдаанаар хянан хэлэлцэж, нэхэмжлэгчийн гаргасан нэхэмжлэлийн шаардлагын зарим хэсгийг хангаж, тус тогтоолын 2 дахь заалтын "хурдан морины уралдаан" гэх хэсгийг хууль бус байсныг тогтоож шийдвэрлэсэн. Харин Захиргааны хэрэг шүүхэд хянан шийдвэрлэх тухай хуулийн 54 дүгээр зүйлийн 54.1.1 дэх хэсэгт заасныг баримтлан нэхэмжлэлийн шаардлагын үлдэх хэсэг болох Монгол Улсын Засгийн газрын 2021 оны 06 дугаар сарын 23-ны өдрийн 171 дүгээр тогтоолын 3 дахь заалтыг хууль бус байсан болохыг тогтоолгох шаардлагыг хүлээн авахаас татгалзаж, холбогдох хэргийг хэрэгсэхгүй болгож шийдвэрлэсэн байна.

     “Монфемнет Үндэсний Сүлжээ” ТББ хувьд эмэгтэйчүүдийн эрхийг хамгаалах чиглэлээр үйл ажиллагаа явуулдаг байх тул дээрх Засгийн газрын тогтоолоор шийдвэрлэсэн асуудлаар нэхэмжлэл гаргах эрхгүй гэж үзэж тус төрийн бус байгууллагаас гаргасан нэхэмжлэлийг Захиргааны хэрэг шүүхэд хянан шийдвэрлэх тухай хуулийн 54 дүгээр зүйлийн 54.1.5 дахь хэсэгт заасныг баримтлан нэхэмжлэлийг хүлээн авахаас татгалзаж, холбогдох хэргийг хэрэгсэхгүй болгосон.