Монгол Улсад Өмгөөллийн байгууллага үүсэж хөгжсөний 94 жилийн ойг тохиолдуулан Хууль зүйн зөвлөгөө үнэ төлбөргүй өгөх зорилготой “Өмгөөлөгч танд тусалъя өдөрлөг-2022” 2022-06-04-ний өдөр 10.00-17.00 цагийн хооронд Сүхбаатарын талбайд боллоо.

     Энэхүү өдөрлөгт Шүүхийн ерөнхий зөвлөл болон Нийслэл дэх Захиргааны хэргийн анхан шатны шүүх, Сүхбаатар, Чингэлтэй дүүргийн Иргэний хэргийн анхан шатны шүүх, Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн тамгын газар хамтран оролцож, иргэдэд шүүхийн үйлчилгээг сурталчилж, зөвлөн туслах үйлчилгээ үзүүлж оролцов.

     Тус өдөрлөгийг нээж, Өмгөөлөгчдийн холбооны Ерөнхийлөгч Б.Оюу-Эрдэнэ үг хэллээ.

     Монголын өмгөөлөгчдийн холбоо нийгмийн хариуцлагын хүрээнд иргэдийн хууль ёсны ашиг сонирхлыг хамгаалах, хууль зүйн туслалцаа үзүүлэх, иргэний эрх зүйн боловсролыг дэмжих сурталчлах зорилгоор ийнхүү жил бүр үнэ төлбөргүй зөвлөгөө өгөх өдөрлөгийг зохион байгуулдаг.

     Энэ удаад Нийслэлийн Засаг даргын Тамгын газартай хамтран дээрх өдөрлөгийг зохион байгуулж байгаа бөгөөд тус өдөрлөгт Шүүхийн ерөнхий зөвлөл, нийслэл дэх анхан шатны шүүхүүд, Монгол Улсын ерөнхий прокурорын газар, Цагдаагийн ерөнхий газар, Шүүхийн шийдвэр гүйцэтгэх ерөнхий газар, Улсын бүртгэлийн ерөнхий газар, Архивын ерөнхий газар, МҮХАҮТ-ын дэргэдэх Монголын Олон Улсын Арбитр, Монголын хуульчдын холбоо, Хууль зүйн үндэсний хүрээлэн, Хууль зүйн туслалцааны төв, Монголын нотариатчидын танхим оролцов. Оролцогч байгууллагууд иргэдэд үнэ төлбөргүй зөвлөгөө мэдээлэл өгч, зөвлөн туслах үйлчилгээ үзүүллээ.

НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХ