Шүүхийн шийдвэрийн огноо, дугаар: 2022.11.16-ны өдрийн 128/ШШ2022/0861
Шийдвэрийн төлөв: Хүчин төгөлдөр болсон
2022.12.16 Хураангуй-12

Туршилтаар

     “Н” дүүргийн Засаг даргаас иргэн Ц-ийн газар эзэмших эрхийн гэрчилгээг  “...дүүргийн газар зохион байгуулалтын төлөвлөгөөнд тусгагдаагүй байршилд газар эзэмших эрх олгогдсон ...” гэх үндэслэлээр хүчингүй болгожээ.

     Иргэн Ц-ээс дээрх шийдвэрийг эс зөвшөөрч “....газрын алба, дүүргийн Засаг даргаас нэг ч хүн ирж уг газрыг ашиглах боломжтой, боломжгүй талаар хэлээгүй...би иргэн “С”-ээс худалдаж авсан газраа эзэмшиж чадахгүй байгаад гомдолтой байна...”  хэмээн шүүхэд нэхэмжлэл маргажээ.

     Хэрэгт авагдсан Газар зохион байгуулалт, Геодези, зураг зүйн газрын албан бичиг, Нийслэлийн кадастрын мэдээллийн сангийн зургууд болон шүүхээс маргаан бүхий газар дээр үзлэг хийсэн тэмдэглэл зэргээр  иргэн Ц-ийн эзэмшихийг хүсэж буй нэгж талбарын дугаар бүхий газар нь улсын чанартай авто замын зурвас газарт орсон байх бөгөөд Авто замын тухай хуульд “...улсын чанартай ...авто замын зурвас газрын өргөн 100 метр /замын тэнхлэгээс хоёр тийш 50 метр/, орон нутгийн чанартай авто замын зурвас газрын өргөн 60 метр /замын тэнхлэгээс хоёр тийш 30 метр/ байна” гэж, “авто замын зурвас газарт авто замын ашиглалттай холбоогүй болон эрх бүхий байгууллагын зөвшөөрөлгүй аж ахуйн үйл ажиллагаа эрхлэх;” үйл ажиллагаа явуулахыг хориглохоор зохицуулжээ.

     Шүүх Авто замын тухай хууль тогтоомжийг харьяалах нутаг дэвсгэртээ хэрэгжүүлсэн дүүргийн Засаг даргын шийдвэрийг хууль бус хэмээн хүчингүй болгох боломжгүй, илт хууль бус актын шинжгүй гэж үзэж нэхэмжлэлийн шаардлагыг хэрэгсэхгүй болгож шийдвэрлэсэн.

Шүүхийн шийдвэрийг бүрэн эхээр нь үзэх холбоос:

https://shuukh.mn/single_case/11928?daterange=2022-01-01%20-%202023-01-02&id=1&court_cat=3&bb=1

 Хураангуй бэлтгэсэн: Нийслэл дэх Захиргааны хэргийн анхан шатны шүүхийн шүүгч  Л.Батбаатар