2023 оны 02 дугаар сарын 03-ны өдөр ХБНГУ-ын Хансс Зайдель сангийн Монгол дахь төлөөлөгчийн газрын тэргүүн ноён Феликс Гленк, Эрх зүйн боловсрол академийн төслийн менежер С.Бүжинлхам, Төслийн зохицуулагч С.Мөнхжаргал  нар Нийслэл дэх захиргааны хэргийн анхан шатны шүүхэд зочилж шүүхийн үйл ажиллагаатай танилцан шүүгч, ажилтнуудтай уулзлаа.

     Уулзалтад тус шүүхийн Ерөнхий шүүгч Н.Дуламсүрэн, Тамгын газрын дарга Н.Батхүү болон бусад шүүгч, ажилтнууд оролцож хамтын ажиллагааны хөгжил, одоогийн байдал, хэтийн төлөвийн талаар харилцан санал солилцов. 

     Ерөнхий шүүгч Н.Дуламсүрэн Хансс Зайделийн сан нь Монгол Улсад Захиргааны хэргийн шүүх байгуулагдсан цагаас эхлэн тус шүүхийн үйл ажиллагаа, техник технологийн тал дээр байнга дэмжиж, улмаар шүүгчийн сургалт, мэргэшүүлэх сургалтын хөтөлбөрийг олон жил амжилттай зохион байгуулан шүүгчдийн мэдлэг, ур чадварт үнэтэй хувь нэмэр оруулж ирснийг талархан дурдаад цаашид энэхүү хамтын ажиллагаагаа улам боловсронгуй болгож үргэлжлүүлэх сонирхолтой байгаагаа илэрхийлэхэд Ханнс Зайделийн сангийн Монгол дахь төлөөлөгчийн газрын тэргүүн ноён Феликс Гленкээс уг саналыг илүү нарийвчилж ирүүлснээр энэ хүрээнд хамтран ажиллах боломж байгааг хэллээ.   

НИЙСЛЭЛ ДЭХ ЗАХИРГААНЫ ХЭРГИЙН АНХАН ШАТНЫ ШҮҮХИЙН ТАМГЫН ГАЗАР