Шүүгчийн захирамжийн огноо, дугаар: 2023.02.03-ны өдрийн 128/ШЗ2023/1314

Захирамжийн төлөв: Хүчин төгөлдөр болоогүй

2023.02.08 Процессын тойм-4

     Иргэн Мөнхөөгөөс Монголбанканд холбогдуулан “Монголбанк 2005-2012 оны хооронд алт тушаагч иргэнийг ашигт малтмалын лиценз эзэмшигч, олборлогч аж ахуйн нэгжтэй адилтган ашигт малтмалын нөөц ашигласны төлбөрийг банканд худалдсан алтны үнийн дүнгээс 5-10 хувиар тооцон шууд суутган авч байсан шийдвэр, үйл ажиллагаа хууль бус болохыг тогтоолгох, мөн татварт хууль бусаар суутган авсан мөнгөн дүнгээр хохирол учирсныг тогтоолгож, хохирлоо Монголбанкнаас буцаан гаргуулж авах” агуулга бүхий нэхэмжлэлийг шүүхэд гаргажээ.

     Хэрэг хянан шийдвэрлэх ажиллагааны явцад буюу 2022 оны 12 дугаар сарын 23-ны өдөр Монгол Улсын Их Хурлаас Захиргааны хэрэг шүүхэд хянан шийдвэрлэх тухай хуульд нэмэлт, өөрчлөлт оруулсан байх бөгөөд тус нэмэлт, өөрчлөлт нь 2023 оны 02 дугаар сарын 03-ны өдрөөс эхлэн хүчин төгөлдөр мөрдөгдөж эхэлжээ.

     Дээрх нэмэлт, өөрчлөлтийн дагуу Засгийн газар болон Монголбанкнаас гаргасан шийдвэртэй холбоотой маргааныг Захиргааны хэргийн давж заалдах шатны шүүх шийдвэрлэхээр зохицуулсан байна.

     Иймд, хуулиар шүүхийн харьяаллыг өөрчилсөн байх тул шүүх Захиргааны хэрэг шүүхэд хянан шийдвэрлэх тухай хуульд заасны дагуу Монголбанканд холбогдох захиргааны хэргийг “Захиргааны хэргийн анхан шатны шүүхийн харьяаллын бус” гэдэг үндэслэлээр хэрэгсэхгүй болгож, нэхэмжлэлийг хүлээн авахаас татгалзаж шийдвэрлэв.

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч Т.Мөнх-Эрдэнэ