Нийслэл дэх захиргааны хэргийн анхан шатны шүүх

Монголын Хуульчдын холбооны Ерөнхийлөгч П.Одгэрэлийг хүлээн авч уулзлаа.

Монголын Хуульчдын холбооны Ерөнхийлөгч П.Одгэрэл, Тамгын газрын дарга Ш. Жолбарс нарыг 2023 оны 03 дугаар сарын 16-ны өдөр тус шүүхийн Ерөнхий шүүгч Н.Дуламсүрэн хүлээн авч уулзлаа.

Уулзалтад шүүхийн Тамгын газрын дарга Н.Батхүү болон шүүгчдийн төлөөлөл, Тамгын газрын зарим ажилтнууд байлцав.

Уулзалтын үеэр Нийслэл дэх Захиргааны хэргийн анхан шатны шүүх, шүүхийн тамгын газрын бүтэц, зохион байгуулалт, шүүн таслах ажиллагааны талаар товч танилцуулгыг хийж Хуульчдын холбоотой хамтран шүүхэд итгэх иргэдийн итгэлийг нэмэгдүүлэх чиглэлээр хийгдэх бүтээлч ажлууд болон шүүгчдийн хууль хэрэглээний нэгдмэл байдлыг дээшлүүлэх сургалт, уулзалт, хэлэлцүүлэг зохион байгуулах зэрэг саналуудыг дэвшүүлж, харилцан санал бодлоо солилцлоо.

Мөн түүнчлэн шүүхийн Тамгын газрын дарга Н.Батхүү Хуульчийн эрх зүйн байдлын тухай хуульд шүүх хуралдааны нарийн бичгийн даргын албан тушаал нь мэргэжлийн дадлагад тооцохгүй байгаа талаарх асуудлыг хөндөж Хуульчдын холбооны байр суурийг сонслоо.

Ерөнхий шүүгч Н.Дуламсүрэн “Та бүхэн бидний урилгыг хүлээн авч хүрэлцэн ирсэнд баярлалаа. Бидний тавьсан санал хүсэлтийг хүлээн авч хамтран ажиллахаар болсонд Монголын Хуульчдын холбооны Ерөнхийлөгч П.Одгэрэл, Тамгын газрын дарга Ш.Жолбарс нарт талархаж байна. Мөн тус шүүхийн түүхт 20 жилийн ой угтсан олон арга хэмжээг хамтран зохион байгуулна гэдэгт итгэлтэй байна” гэснээр уулзалт өндөрлөв.