Шүүхийн шийдвэрийн огноо, дугаар: 128/ШШ2023/0483
Шийдвэрийн төлөв: Хүчин төгөлдөр болсон
2023.07.27 Шийдвэрийн тойм-12

    П ХХК-д 2.500.000 төгрөгөөр торгох шийтгэл оногдуулсан Нийслэлийн шүүхийн шийдвэр гүйцэтгэх газрын ахлах шийдвэр гүйцэтгэгчийн шийтгэлийн хуудсыг хүчингүй болгуулахаар тус компанийн гүйцэтгэх захирал С нэхэмжлэл гаргасан.

    Сүхбаатар дүүргийн иргэний хэргийн анхан шатны шүүхийн шийдвэрээр хариуцагч П ХХК-иас 10.436.909,89 төгрөг гаргуулж, нэхэмжлэгч Х ХХК-д олгохоор шийдвэрлэсэн бөгөөд тус шүүхийн шүүгчийн захирамжаар шийдвэрийг албадан гүйцэтгүүлэхээр шийдвэрлэжээ.

    Уг шийдвэрийн дагуу Нийслэлийн шүүхийн шийдвэр гүйцэтгэх газраас П ХХК-д холбогдуулан шийдвэр гүйцэтгэх ажиллагаа үүсгэж, Зарлан дуудах мэдэгдлээр П ХХК-ийг хүрэлцэн ирэхийг мэдэгдсэн, Шүүхийн шийдвэр биелүүлэх мэдэгдлээр Х ХХК-д төлөх төлбөрийг төлөхийг мэдэгдсэн, тухайн компанид биеэр болон утсаар боловч дуудан ирүүлэх ажиллагааг явуулсан боловч П ХХК нь дээрх шийдвэрүүдийг биелүүлээгүй, дуудсан хугацаанд хүрэлцэн ирээгүй.

     Нийслэлийн шүүхийн шийдвэр гүйцэтгэх газрын Зөрчлийн хэрэг нээх тухай тогтоолоор шийдвэр гүйцэтгэгчээс гаргасан гомдлын дагуу П ХХК-д холбогдуулан зөрчлийн хэрэг бүртгэлийн ажиллагаа явуулахад П ХХК-ийн гүйцэтгэх захирал С нь “мэдэгдлийг хүлээн авсан. ...шүүхийн шийдвэрт заасан төлбөрийг төлөхийг мэдэж байсан. Гэвч компанийн үйл ажиллагаа зогссон. Шүүхийн шийдвэртэй маргаагүй төлнө...” , “төлбөр төлөх боломжгүй байсан болохоор ирээгүй” гэж тайлбарласан байна.

    Шүүхээс П ХХК-ийн гаргасан Зөрчлийн тухай хуулийн 15.2 дугаар зүйлийн 2.1-т “төрийн албан хаагчаас тавьсан хууль ёсны шаардлагыг биелүүлээгүй, ...”, 2.2-т “төрийн албан хаагчийн үйл ажиллагаанд нь саад учруулсан;” зөрчилд ногдуулсан Нийслэлийн шүүхийн шийдвэр гүйцэтгэх газрын ахлах шийдвэр гүйцэтгэгчийн шийтгэлийн хуудсыг хуульд нийцсэн гэж дүгнэлээ.

     Санамж: Энэ тойм нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

  Шүүхийн шийдвэрийг бүрэн эхээр нь үзэх холбоос:

      https://shuukh.mn/single_case/12999?daterange=2023-01-01%20-%202023-08-09&id=1&court_cat=3&bb=1

Тойм бичсэн: Нийслэл дэх Захиргааны хэргийн анхан шатны шүүхийн Шүүгч Б.Адъяасүрэн