Шүүгчийн захирамжийн огноо, дугаар: 2023.12.07-ны өдрийн 128/ШЗ2023/10137

      Захирамжийн төлөв: Хүчин төгөлдөр болсон

      2024.02.14 Процессын тойм-2

    Нийгэмд үйлчилдэг Төрийн бус байгууллага болох “А” нь Захиргааны хэргийн шүүхэд хандаж “...Байгаль орчин, аялал жуулчлалын сайдын 2011 оны А/198 дугаар тушаалын “ГХ” ХХК-д холбогдох хэсэг болон мөн Сайдын 2022 оны 2/344 дүгээр тушаалын тус компанид холбогдох хэсгийг тус тус хүчингүй болгуулах” нэхэмжлэлийн шаардлага гаргаж түүний үндэслэлээ “...манай Төрийн бус байгууллага нь байгаль орчныг хамгаалах, хүрээлэн байгаа орчин, хүүхдийн эрх, нийтийн эрүүл мэнд, нийтийн өмч болон нийтийн эрх ашгийг нэхэмжлэн хамгаалах үндсэн зорилготойгоор байгуулагдсан...дээрхи тушаал нь нийтийн эрх ашиг, байгаль орчинд сөрөг үр дагавар үүсгэж байгаа...” гэж тодорхойлсон.

      Захиргааны хэрэг шүүхэд хянан шийдвэрлэх тухай хуулийн 18.3-д “Хуулиар тусгайлан эрх олгогдсоноос бусад нийтийн ашиг сонирхлыг төлөөлөх эрх бүхий этгээд нь хүрээлэн байгаа орчин, хүүхдийн эрх, нийтийн эрүүл мэнд, нийтийн өмчийг хамгаалах асуудлаар шүүхэд нэхэмжлэл гаргах эрхтэй бөгөөд уг этгээд дараахь шаардлагыг хангасан байна”, 18.3.1-д “нэхэмжлэлийн шаардлага нь тухайн байгууллагын дүрмийн зорилгод нийцсэн байх” 18.3.2-т “дүрмийн зорилгын дагуу сүүлийн гурваас доошгүй жил тогтвортой үйл ажиллагаа явуулсан байх” гэж тус тус заасан.

      Хэрэгт цугларсан баримтаар нэхэмжлэгч нь уг нэхэмжлэлийг гаргахаас өмнөх 3 жилийн хугацаанд өөрийн дүрэмд заасан “хүрээлэн буй орчныг хамгаалах” зорилгын дагуу тогтвортой үйл ажиллагаа явуулаагүй, мөн Төрийн бус байгууллагын тухай хуулийн 23 дугаар зүйлд зааснаар үйл ажиллагааны тайланг чиглэл бүрээр гаргаж холбогдох төрийн байгууллагад хүргүүлсэн байх, жилийн тайлан тэнцлээ гаргаж дараа оны 02 дугаар сарын 15-ны дотор татварын албанд өгөх шаардлагуудыг биелүүлээгүй болох нь тогтоогдсон.    

      Нийтийн ашиг сонирхлыг төлөөлөн нэхэмжлэл гаргаж буй этгээдэд хуулиар тодорхой шаардлага тогтоож өгсөн, уг шаардлагыг хангаагүй нөхцөлд шүүх тухайн нэхэмжлэлээр захиргааны хэрэг үүсгэх боломжгүй тул шүүх “нэхэмжлэл гаргах эрхгүй этгээд нэхэмжлэл гаргасан” гэж үзэж “А” НҮТББ-ын нэхэмжлэлийг хүлээн авахаас татгалзаж шийдвэрлэв.

Тойм бэлтгэсэн: Нийслэл дэх Захиргааны хэргийн анхан шатны шүүхийн Ерөнхий шүүгч Н.Дуламсүрэн