Нийслэл дэх Захиргааны хэргийн анхан шатны шүүхээс Захиргааны хэргийн шүүх байгуулагдсаны 20 жилийн ой тохиож байгаатай холбогдуулан  “Ерөнхий боловсролын сургуулиудын ахлах ангийн сурагчдад шүүхийн үйл ажиллагааны талаар мэдээлэл хүргэх тухай” хөтөлбөрийг баталсан.

    Энэхүү хөтөлбөр нь Шүүхийн тухай хуульд заасны дагуу шүүхийн үйл ажиллагааг нээлттэй, олон нийтэд ил тод байлгах зарчмын хэрэгжилтийг хангах, мөн ерөнхий боловсролын сургуулийн мэргэжлээ сонгох гэж буй ахлах ангийн сурагчдад мэргэжлийн чиг баримжаа олгох үүднээс тэднийг шүүхдээ хүлээн авч шүүхийн байгууллага, тэр дундаа Захиргааны хэргийн шүүх, шүүгч болон шүүхийн тамгын газрын ажилчдын өдөр тутмын ажилтай бодитоор танилцуулах зорилгыг тус тус агуулсан.

     “Ерөнхий боловсролын сургуулиудын ахлах ангийн сурагчдад шүүхийн үйл ажиллагааны талаар мэдээлэл хүргэх тухай” хөтөлбөр 2024.03.19 - 2024.04.11-ний өдрийн хооронд үргэлжлэх бөгөөд нийтдээ 4 удаагийн танилцуулгыг Сүхбаатар дүүрэг дэх ерөнхий боловсролын сургуулийн ахлах ангийн сурагчдыг хамруулахаар төлөвлөгдсөн.

     Дээрх ажлын хүрээнд 2024 оны 03 дугаар сарын 19-ний өдөр Нийслэлийн ерөнхий боловсролын 35-р сургуулийн 12 дугаар ангийн сурагчдыг хүлээн авч Захиргааны хэргийн шүүхийн онцлог, түүний үүсэл хөгжил, бүтэц, зохион байгуулалтын талаар мэдээлэл өгч, шүүхийн байр, шүүх хуралдааны танхимуудыг танилцууллаа.

     Уг шүүхийн үйл ажиллагааны танилцуулгын төгсгөлд тус шүүхийн шүүгч Б.Мөнх-Эрдэнэ сурагчдын сонирхсон асуултад хариулт өгөн шүүгчийн ажил мэргэжлийн талаар ойлголт өгөв.

 Нийслэл дэх Захиргааны хэргийн анхан шатны шүүхийн Тамгын газар