Нийслэл дэх Захиргааны хэргийн анхан шатны шүүхийн Тамгын газраас Монгол Улсад Захиргааны хэргийн дагнасан шүүх байгуулагдсаны 20 жилийн ой тохиож байгаатай холбогдуулан хууль зүйн их, дээд сургуулийн оюутнуудад өөрийн шүүхийн шүүгч нарын шийдвэрлэгдэж, хуулийн хүчин төгөлдөр болсон сонирхолтой кэйсүүдийг тайлбарлаж, ярилцах “Кейс судлал” 4 удаагийн цуврал уулзалт, ярилцлага хөтөлбөрийг хэрэгжүүлж байгаа билээ.

      Энэхүү төлөвлөгөөний дагуу ээлжит “ЗХШ-Кейс судлал” уулзалт, ярилцлагыг 2024 оны 04 дүгээр сарын 12-ны өдөр Захиргааны хэргийн давж заалдах шатны шүүх хуралдааны танхимд зохион байгууллаа. Тус уулзалт ярилцлагад МУИС, ДХИС, СЭЗИС, Шихихутаг Их сургууль, Монгол Улсын Эрдмийн их сургууль, Глобал удирдагч их сургууль, Рояал их сургууль, Олон Улсын Улаанбаатар их сургууль, Идэр их сургууль, Үндэсний техникийн их сургууль, Сити их сургууль, Орхон их сургуулиудын Эрх зүйн 2-5 дугаар курсын оюутнуудыг хүлээн авлаа.

     Тус уулзалт, ярилцлагаар Нийслэл дэх Захиргааны хэргийн анхан шатны шүүхийн шүүгч Л.Батбаатар “Гадаадын хөрөнгө оруулалттай компани газар эзэмших эсхүл ашиглах эрхтэй юу?” сэдвээр оюутнуудад тайлбарлаж, ярилцлаа.

     Дээрх сэдвийн хүрээнд гадаадын иргэн, хуулийн этгээдэд Монгол Улсад газар эзэмшүүлэх, ашиглуулах харилцааг хууль, олон улсын гэрээгээр хэрхэн зохицуулдаг, Газрын тухай хууль дээрх зарим заалт, Компанийн тухай хууль болон Гадаадын хөрөнгө оруулалтын тухай хуультай хэрхэн холбогддогийг нийтийн эрх зүй дэх зарчимтай уялдуулан тайлбарлав.

Нийслэл дэх Захиргааны хэргийн анхан шатны шүүхийн Тамгын газар