Шүүгчийн захирамжийн огноо, дугаар: 2024.05.24-ний өдрийн 128/ШЗ2024/4514  

      Шийдвэрийн төлөв: Хүчин төгөлдөр болсон.

      Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

      УЕПГ-ын хяналтын прокуророос Нийслэлийн Засаг даргад холбогдуулан “Засаг даргын 2016 оны 03 дугаар сарын 23-ны өдрийн “Газар эзэмшүүлэх эрхийн талбайн хэмжээ, зориулалт өөрчлөх тухай” А/231 дугаар захирамжийн “ДМ” ХХК-д холбогдох хэсгийг хүчингүй болгуулах”-аар  нэхэмжлэл гаргасан.

     Хэрэг хянан шийдвэрлэх ажиллагааны явцад шүүхээс Захиргааны хэрэг шүүхэд хянан шийдвэрлэх тухай хуульд заасны дагуу хүлээн авах шүүхийн харьяаллын маргаан биш байна гэж үзэхдээ, Захиргааны хэрэг шүүхэд хянан шийдвэрлэх тухай хуулийн зорилго, захиргааны хэргийн шүүхийн чиг үүрэг, нэхэмжлэл гаргах эрхийг прокурорт олгосон Прокурорын тухай хуулийн зорилго, прокурорын байгууллагын чиг үүрэг, хүний эрх, эрх чөлөөг зөрчигдсөн тохиолдолд сэргээн хамгаалдаг шүүх эрх мэдлийн байгууллагуудын болон хуулийг хэрэгжүүлэх үүрэг бүхий гүйцэтгэх эрх мэдлийн буюу захиргааны байгууллага хоорондын харилцаа, чиг үүргийн уялдаа, давхардал, Улсын дээд шүүхээс хууль тайлбарлаж гаргасан тогтоол зэрэгт анхаарал хандуулж, шүүхийн харьяаллын талаар дүгнэлт өгснөөр хэргийг хэрэгсэхгүй болгож, нэхэмжлэлийг нь хүлээн авахаас татгалзаж шийдвэрлэсэн байна.

    Тодруулбал, Захиргааны хэргийн шүүхээс хариуцагч Нийслэлийн Засаг даргын захирамжийг хууль бус болохыг тогтоож, хүчингүй болгуулах нэхэмжлэлийн шаардлагын үндэслэлийг хянахын тулд маргаан бүхий захирамж нь захиргааны үйл ажиллагаагаар хэлбэржин гарахдаа хуульд үндэслэх зарчмыг зөрчсөн эсэх, шийдвэр гаргах ажиллагааны журам зөрчсөн эсэх зэрэг нөхцөл байдлуудыг шүүхээс шалган тогтоох нь Захиргааны хэрэг шүүхэд хянан шийдвэрлэх тухай хуулийн зорилго болон уг шүүхийн зорилгод нийцэхгүй гэж үзсэнээс гадна Газрын тухай хууль тогтоомжийн хэрэгжилтийг зохион байгуулж, хангуулах талаарх бүрэн эрхийг хэрэгжүүлэх эрхтэй хариуцагч Нийслэлийн Засаг даргын бүрэн эрхэд шууд халдаж, захиргааны нэрийн өмнөөс маргаан бүхий асуудлыг судлан шалгахаар ажлын хэсэг байгуулж, улмаар захиргааны хэргийн шүүхэд хандаж буйг, прокурорын байгууллагаас Үндсэн хуулийн “...ажиллагаанд хяналт тавьж, шүүх хуралдаанд төрийн нэрийн өмнөөс оролцох” чиг үүргийг хэрэгжүүлж байгаа бус, харин захиргааны байгууллагын өмнөөс тухайлбал, хариуцагч захиргааны байгууллагын бүрэн эрх, чиг үүргийг хэрэгжүүлэхээр тус шүүхэд нэхэмжлэл гаргасан нь хуулийн хүрээнд биш байна зэргээр үзэж, УЕПГ-ын хяналтын прокуророос гаргасан нэхэмжлэлийг шүүхийн харьяалан шийдвэрлэх маргаан биш гэж дүгнэжээ.

Тойм бэлтгэсэн: Нийслэл дэх Захиргааны хэргийн анхан шатны шүүхийн шүүгч У.Бадамсүрэн